Чӑваш Енре «Халӑх дружинникӗ» конкурс иртнӗ. Унта муниципалитет тата хула шайӗнче ҫӗнтернӗ 20 ҫын хутшӑннӑ. Конкурса Юстици ӗҫӗсен патшалӑх служби ШӖМпе пӗрле ирттернӗ.
Пӗрремӗш вырӑна Елчӗк районӗнчи Алексей Тихонов йышӑннӑ. Иккӗмӗш вырӑна Канаш районӗнчи Вячеслав Шпаков тухнӑ. Виҫҫӗмӗш вырӑна вара Элӗк районӗнчи халӑх дружинникӗ Эльвира Иванова йышӑннӑ.
Малти вырӑнсене тухнисене дипломпа тата парнесемпе хавхалантарнӑ.
Авӑн уйӑхӗн 13-мӗшӗнче Елчӗк районӗнче тракторист сарӑмсӑр вилнӗ. РФ Следстви комитечӗ пӗлтернӗ тӑрӑх, вӑл хӑйӗн тракторӗ айне пулнӑ.
Ҫав кун «Труд» ял хуҫалӑх производство кооперативӗнче 15 сехетре 34 ҫулти арҫын удобрени пушатнӑ чухне хӑйӗн тракторӗн кустӑрми айне пулнӑ. Вӑл ҫавӑн чухнех сывлама пӑрахнӑ.
Халӗ следовательсем ӗҫ-пуҫа тӗпчеҫҫӗ. Ку ӗҫе Ӗҫ инспекцийӗн ӗҫченӗсене те явӑҫтарӗҫ.
Елчӗк районӗнче 88 ҫулти арҫын 91 ҫулти хӗрарӑма хӗнесе пӗтернӗ. Район прокуратури ун тӗлӗшпе пуҫарнӑ пуҫиле ӗҫе суда ярса панӑ.
Следстви палӑртнӑ тӑрӑх, авӑн уйӑхӗн 12-мӗшӗнче ҫак арҫын ӳсӗр пулнӑ, кӳрше каҫнӑ. 91 ҫулти хӗрарӑм унпа эрех ӗҫме килӗшмен-мӗн. Кӳрши ӑна хӗнеме пуҫланӑ: кӗлеткинчен тапнӑ, ҫапнӑ. Ку кӑна мар - мӑйӗнчен пӑвма пуҫланӑ, вӗлерессипе хӑратнӑ.
Ҫу уйӑхӗн 24-мӗшӗнче 16 сехетре «Елчӗк-Курнавӑш» ҫул ҫинче «Лада Гранта» автомобиль «Лада Калина» машинӑпа пырса ҫапӑннӑ. «Гранта» рулӗ умӗнче 52 ҫулти сусӑр ҫын пулнӑ. Вӑл машинӑна сехетре 130 километр хӑвӑртлӑхпа хӑваланӑ.
«Калина» машинӑра инкек вӑхӑтӗнче 6 ҫын пулнӑ. Салонта ларса пынӑ 61 ҫулти хӗрарӑм машинӑран тухса ӳксе вилнӗ. Водитель тата тепӗр тӑватӑ пассажир аманнӑ.
Лада Гранта» автомобиль водителӗ те шар курнӑ. Вӑл ӳсӗр пулнӑ.
Асӑннӑ пӑтӑрмахпа ҫыхӑннӑ ӗҫе халӗ Елчӗк районӗнчи суда ярса панӑ.
Ӗнер, ҫурла уйӑхӗн 13-мӗшӗнче, Елчӗк районӗнче «Комсомольски – Елчӗк – Пӑва» ҫул ҫинче 59 ҫулти мопедист машина кустӑрми айне пулса вилнӗ.
11 сехет тӗлнелле ҫак арҫын тӗп ҫул ҫине тухнӑ. Анчах вӑл машина килнипе килменнине лайӑх пӑхман ахӑртнех. Ҫав вӑхӑтра ҫулпа сӗт турттаракан машина пынӑ. Мопедист та, водитель те пӑрӑнас тесе хӑтланнӑ. Анчах… Шел те, 59 ҫулти арҫын вилмеллех суранланнӑ. Ҫакӑ паллӑ: унӑн мопедпа ҫӳреме ирӗк паракан документсем пулман.
Елчӗк районӗнче пурӑнакан 73 ҫулти хӗрарӑм пӗлтӗр инсульт чӑтса ирттернӗ. Нумаях пулмасть вӑл каллех пуҫ ыратнипе аптӑранӑ. Сылтӑм урипе алли туйӑмлӑхне ҫухатнӑ. Вырӑнти фельдшер васкавлӑ медпулӑшу чӗннӗ.
Алена Шляпина тата Елена Данилова фельдшерсем ӑна пӗрремӗш медпулӑшу панӑ. Ӑна кислородпа сывлаттарса Патӑрьел районӗн пульницине илсе ҫитернӗ. КТ хӗрарӑмӑн пуҫ мимине юн кайнине ҫирӗплетнӗ. Кун хыҫҫӑн пациента Канашри медцентра илсе кайнӑ. Ҫав вӑхӑтра фельдшерсем хӗрарӑма сӑнаса пынӑ, кирек хӑш вӑхӑтра та пулӑшу пама хатӗр тӑнӑ.
Паян ирхине Елчӗк районӗнче «Ладӑн» вунтӑваттӑмӗш моделӗ ҫул ҫинчен тухса кайса юпана пырса тӑрӑннӑ. Руль умӗнче полици тытӑмӗнче ӗҫлекен 40 ҫулти арҫын пулнӑ. Ӑна, аманнӑскере, пульницӑна илсе ҫитернӗ. Салонра, телее, урӑх никам та пулман.
Халӗ Шалти ӗҫсен министерствин ӗҫченӗсем ӗҫ-пуҫа уҫӑмлатаҫҫӗ. Авари мӗншӗн пулнине тӗпчеҫҫӗ.
Ҫанталӑк шӑрӑх тӑрать. Ҫынсем шывра чӑмпӑлтатса уҫӑлаҫҫӗ. Анчах шыв ҫинче инкек пуласси те часах. Республикӑра 3 кунра пилӗк ҫын путса вилнӗ.
Ҫурлан 4-мӗшӗнче Шупашкарта тӗп пляжра Атӑлтан арҫын виллине кӑларнӑ. Тепӗр кунхине ГЭС патӗнче Ҫӗнӗ Шупашкарти 46-ри арҫын путса вилнӗ. Вӑл ӳсӗрле шыва кӗнӗ. Ҫав кунах Елчӗк районӗнче 47 ҫулти арҫыннӑн пурнӑҫӗ шыва кӗнӗ чухне татӑлнӑ.
Ҫурлан 6-мӗшӗнче Улатӑр районӗнче 47 ҫулти арҫын путнӑ. Ҫав кунах Комсомольски районӗнче 49-ти хӗрарӑм шывран тухайман.
Елчӗк районӗнче Тӑван ҫӗршывӑн Аслӑ вӑрҫине хутшӑннӑ пӗртен-пӗр ветеран юлнӑ. Вӑл - Чӑваш Тӑрӑмӗнче пурӑнакан Илья Волков.
Ҫурла уйӑхӗн 1-мӗшӗнче Илья Степанович 102-мӗш ҫуралнӑ кунне паллӑ тунӑ. Вӑл фронта кайнӑ чухне 20-ре пулнӑ. Вӑрҫӑра икӗ хутчен аманнӑ. Тӑван тӑрӑхне 1946 ҫулта таврӑннӑ. Ҫулталӑкран Илья Волков авланнӑ, мӑшӑрӗпе 6 ача ҫуратса ӳстернӗ.
Республикӑри ял хуҫалӑх предприятийӗсем ҫӗнӗ техника туянсах тӑраҫҫӗ. Кун пирки Чӑваш Республикин хӑй тӗллӗн ҫӳрекен машинӑсен тата ытти йышши техникӑн тӑрӑмне пӑхса тӑракан патшалӑх инспекцийӗ хыпарлать.
Сӑмахран, Елчӗк муниципаллӑ округне кӗрекен Элпуҫ ялӗнче вырнаҫнӑ «Эмметево» хуҫалӑх нумай пулмасть «ZOOMLION» ятлӑ 160 лаша вӑйӗллӗ трактор туяннӑ. Китайра кӑларнӑ ҫак тракторсӑр пуҫне «Эмметево» тулли мар яваплӑхлӑ пӗрлешӳ утӑ уйӑхӗнче «ACROSS-585» тырӑ выракан комбайнпа тата пахча-ҫимӗҫ пухакан РСМ-100 «ДОН-680М» комбайнпа пуянланнӑ. Елчӗк тӑрӑхӗнчи тепӗр хуҫалӑх та — Хмелев П.А хресчен (фермер) хуҫалӑхӗ — ҫӗнӗ тракторлӑ пулнӑ.
Вӑрнар муниципаллӑ округра Карл Марк ячӗллӗ ЯХПК ҫӗнӗ трактор туяннӑ. Вӗсене пурне те патшалӑх техника тӗрӗслевӗн ӗҫченӗсем тӗрӗсленӗ, учета илнӗ.
-8.7 °C